ထေရဝါဒ ဗုဒ္ဓသာသနာတော်ကြီး အဓွန့်ရှည်စွာ သန့်ရှင်းတည်တံ့ ထွန်းကားပြန့်ပွားရန် ပရိယတ္တိ၊ ပဋိပတ္တိ၊ ပဋိဝေဓ သာသာနာတော်သုံးရပ်သည် သာသနာပင်စည်ကြီး၏ ရေသောက်မြစ်ကြီးများသဖွယ် ဖြစ်ပါသည်။ ယင်းရေသောက်မြစ် သာသနာသုံးသွယ်အနက် ပရိယတ္တိသာသနာသည် ပဓာနအကျဆုံး ဖြစ်ပါသည်။ ပရိယတ္တိသာသနာမှာ သုတ္တက၊ ဝိနယ၊ အဘိဓမ္မတ္တတို့ ဖြစ်ပြီး အဘိဓမ္မတ္တ အဘိဓမ္မာသည် ဓမ္မရသ တရားအဆီအနှစ် အစုအဝေးတို့ တည်ရာဖြစ်ပြီး အခက်ခဲ အနက်နဲဆုံး ဓမ္မဒေသနာတစ်ရပ်လည်း ဖြစ်ပါသည်။

သာသနာတော်ကွယ်လျှင် အဘိဓမ္မာတရားတော်ကြီးမှ စတင်ကွယ်မည်ဖြစ်ရာ သာသနာ့ခံတပ် အဘိဓမ္မာတရားတော်ကြီး အဓွန့်ရှည်စွာ တည်တံ့ထွန်းကားပြန့်ပွားဖို့ လိုအပ်လှပါသည်။ သို့ပါ၍ အဘိဓမ္မာ မြတ်ဒေသနာတော်ကြီး အဓွန့်ရှည်စွာ တည်တံ့ထွန်းကားပြန့်ပွားရန် ရည်သန်လျက် ဖြူစင်ဖြောင့်မတ် ကောင်းမြတ်သော သမ္မာဆန္ဒများဖြင့် အဘိဓမ္မာမြတ်ဒေသနာ ပြန့်ပွါးရေးအဖွဲ့မှ အဘိဓမ္မာအသင်းကြီး (Abhidhamma Foundation (or) Abhidhamma Society) ကို တည်ထောင်ခဲ့ကြပါသည်။

အဘိဓမ္မာ တည်တံ့ထွန်းကားပြန့်ပွားရေးကို ကြိုးပမ်းဆောင်ရွက်ရာ၌ ကျေးဇူးတော်ရှင် လယ်တီဆရာတော်ဘုရားကြီး၏ ဆန္ဒတော်အရ “အဘိဓမ္မာသည် လူတိုင်းအတွက် ဖြစ်သင့်သည်” ဟူသည့်အတိုင်း အဘိဓမ္မာကို ဗုဒ္ဓဘာသာနွယ်ဝင် မြန်မာသူတော်စင်တို့သာမက ကမ္ဘာသူကမ္ဘာသား ဝေနေယျသတ္တဝါအများပါ သင်ယူလေ့လာ တတ်သိလိမ္မာကြပြီး အသိဝိဇ္ဇာပိုင်းမှ အကျင့်စာရဏပိုင်းထိ ပေါက်မြောက်ကြပြီး ခန္ဓာဥာဏ်ရောက် သစ္စာဆိုက်ကြပါစေ ဟူ၍ နှလုံးသွင်းမိပါသည်။ ယင်းဆန္ဒနှင့်အညီ အဘိဓမ္မာပြန့်ပွါးပြီး သတ္တဝါဝေနေယျအပေါင်း ကာလဒေသမရွေး အဘိဓမ္မာဒေသနာကို သင်ယူလေ့လာ လိမ္မာတတ်မြောက်ကာ သန္တိသုခဝိမုတ္တိရသအတွက် သမထဝိပဿနာယုဂခေတ်ကြီးနှင့်အတူ အဘိဓမ္မာယုဂခေတ်ကြီး အဓွန့်ရှည်စွာ ပေါ်ထွန်းလာစေရန်


(က) သင်ကြားပို့ချခြင်း ၊ စာမေးပွဲကျင်းပ ကျင့်ကြံကြိုးကုတ်ပွါးများအားထုတ်နိုင်စေခြင်း၊ တက္ကသီလာအပိုင်း
(ခ) အဘိဓမ္မာပညာ ဓမ္မဘဏ္ဍာပိဋကတ်တိုက် ထားရှိခြင်းအပိုင်း
(ဂ) သုတေသနပြုခြင်းအပိုင်း
(ဃ) စာအုပ်စာပေပုံနှိပ်ထုတ်ဝေဖြန့်ချီခြင်းအပိုင်း
(င) အဘိဓမ္မာဆိုင်ရာ ဓမ္မသဘင်နှင့် ဆွေးနွေးပွဲ ၊ စာတမ်းဖတ်ပွဲ ၊ စာပြန်ပွဲ ၊ ဓမ္မသာကစ္ဆာဝိုင်းများကျင်းပပြုလုပ်ပေးခြင်း အပိုင်း

ဟူ၍ ဆောင်ရွက်သွားမည်ဖြစ်ပါသည် ။

အဘိဓမ္မာဒေသနာစာပေများကို စာဖိုင်၊ အသံဖိုင်၊ ရုပ်သံဖိုင်များဖြင့် ပါဠိ၊ မြန်မာ၊ အင်္ဂလိပ် သုံးဘာသာဖြင့် ထားရှိပြီး အာကာသဗုဒ္ဓတက္ကသီလာ၊ အွန်လိုင်းဓမ္မဘဏ္ဍာပိဋကတ်တိုက် များဖြင့် ဓမ္မစေတီများ တည်ထားသွားမည် ဖြစ်ပါသည် ။ မဟာနာယက ဩဝါဒစရိယ ဝန်ဆောင်ဆရာတော်ကြီးများနှင့် နာယကကြီးများ လမ်းညွှန်မှုဖြင့် မြန်မာနိုင်ငံရှိ ကျောင်းသားလူငယ် ရင်သွေးငယ်ကလေးများ အဘိဓမ္မာသင်ကြားတတ်မြောက်ရေး၊ အဘိဓမ္မာလေ့လာရေး၊ အဘိဓမ္မာဖြေဆိုရေး၊ နိုင်ငံအနှံ့ အဘိဓမ္မာအသင်းထောက်များ ဖွဲ့စည်းရေး

(က) သင်ကြားပို့ချခြင်းအပိုင်းကိုဆောင်ရွက်ရာ၌ –

(၁) ဗုဒ္ဓဘာသာဝင်တိုင်း အဘိဓမ္မာ လေ့လာတတ်မြောက်ရေး
(၂) စာမေးပွဲကျင်းပရေး၊ ဖြေဆိုရေး
(၃) ကျောင်းသားရင်သွေးငယ်တိုင်း အဘိဓမ္မာ လေ့လာသင်ယူတတ်မြောက်ရေး

(ခ) အဘိဓမ္မာပညာ ဓမ္မဘဏ် ပိဋကတ်တိုက်အပိုင်းကိုဆောင်ရွက်ရာ၌ –

(၁) အဘိဓမ္မာကျမ်းစာများကို စာကြည့်တိုက်အဖြစ် ထားရှိခြင်း
(၂) အွန်လိုင်းအဘိဓမ္မာပိဋကတ်တိုက် ထားရှိခြင်း
(၃) ရှားပါးပြီး တိမ်မြုပ်ပျောက်ကွယ်နေသည့် အဘိဓမ္မာပေရပိုဒ်၊ ကြေးစာ၊ ခေါင်းလောင်းစာ၊ စဥ့်ကွင်း၊ အုတ်ခွက်၊ စာမူ၊ ဓါတ်ပြားတိတ်ခွေများ ရှာဖွေစုဆောင်းထားရှိခြင်း

(ဂ) သုတေသနပြုစုခြင်းအပိုင်းတွင် –

(၁) အဘိဓမ္မာဆိုင်ရာ သုတေသနကျမ်းပေါင်းစုံ ထားရှိခြင်း
(၂) အဘိဓမ္မာဆိုင်ရာ သုတေသနလုပ်ငန်းများ ပြုလုပ်ခြင်း
(၃) အဘိဓမ္မာဆိုင်ရာ သုတေသန သုတေသီများကို ပံ့ပိုးထောက်ပံ့ခြင်း

(ဃ) ပုံနှိပ်ထုတ်ဝေခြင်းအပိုင်းတွင် –
(၁) အဘိဓမ္မာဆိုင်ရာ ကျမ်းစာများကို ပုံနှိပ်ထုတ်ဝေဖြန့်ချိခြင်း

(င) အဘိဓမ္မာဆိုင်ရာ ဓမ္မသဘင်များနှင့် စာတမ်းဖတ်ဟောပြောပွဲများ၊ စာပြန်ပွဲများ ကျင်းပခြင်းအပိုင်းတွင် –

(၁) အဘိဓမ္မာဆိုင်ရာ တရားပွဲများ ကာလဒေသမရွေး ကျင်းပပေးခြင်း
(၂) အဘိဓမ္မာဖတ်ပွဲ၊ ဟောပြောပွဲ၊ ဓမ္မသာကစ္ဆာပွဲ Abhidhamma Synposium များကျင်းပပေးခြင်း

မြန်မာ့အသံမှ Channel တစ်ခုဖြင့် ဗုဒ္ဓနေ့များ၌ အသံမစဲမဟာပဌာန်းပူဇော်ပွဲ၊ ဓမ္မစကြာပူဇော်ပွဲ၊ မေတ္တာပွါးများပူဇော်ပွဲ၊ ဆီမီး၁၀၀၀ ပူဇော်ပွဲ၊ ဆွမ်းကပ်လှူပွဲများ ကျင်းပသွားနိုင်ရန် အကျိုးမျှော်ကိုး၍ ကြိုးစားလုပ်ဆောင်သွားမည် ဖြစ်ပါသည်။

ဤ web စာမျက်နှာတွင် အဘိဓမ္မာမြတ်ဒေသနာ ပြန့်ပွါးရေးအဖွဲ့ကြီးမှ စုဆောင်းရရှိထားသမျှသော အဘိဓမ္မာနှင့်ပက်သက်သည့် စာအုပ်စာပေများ အားလုံးကို စုစည်းပေးသွားပါမည်။ ဤ web စာမျက်နှာနှင့်ပက်သက်၍ ဘဒ္ဒန္တနန္ဒမာလာဘိဝံသ ပါမောက္ခချုပ် ဆရာတော်ဘုရားကြီး ချီးမြှင့်တော်မူသော “အဘိဓမ္မာသင်ယူရခြင်း၏ အကျိုးကျေးဇူး” ဟူသည့် အဖွင့်စာမျက်နှာ စာပိုဒ်အတွက် ဆရာတော်ဘုရားကြီးအား ကျေးဇူးတင်စွာဖြင့် လက်အုပ်ချီမိုး ရှိခိုးပါသည် ဘုရား။

ဗုဒ္ဓသာသနံ စိရံတိဋ္ဌတု

အဘိဓမ္မာအသင်းကြီး(စင်္ကာပူ)